 |
|
WAKATI Serikali ikiendelea kupambana ili madaktari waache mgomo
wao, hali bado ni tete katika Hospitali ya Taifa ya Muhimbili (MNH)
kutokana na hospitali hiyo kugoma kupokea wagonjwa wapya.
MWANAFASIHI lilishuhudia jana wagonjwa hasa wajawazito wakikataliwa
kwa madai kuwa hakuna madaktari, hivyo warejee katika hospitali zilizo
karibu na maeneo yao.
Hali ni mbaya zaidi katika wodi ya watoto ambao wamezaliwa chini ya
muda wao 'njiti' wakihitaji kuwa chini ya uangalizi wa madaktari.
Kutokana na hali hiyo, watoto watano waliokuwa kwenye uangalizi
maalumu wanadaiwa kupoteza maisha juzi na idadi hiyo itaongezeka endapo
mgomo huo utaendelea.
Ili kuonesha mgomo huo ulivyo tete, juzi saa 6 usiku Waziri wa Afya
na Ustawi wa Jamii, Dk. Hadji Mponda, Naibu Waziri Lucy Nkya, Katibu
Mkuu wa wizara hiyo, Blandina Nyoni, Mganga Mkuu wa Serikali, Deo
Mtasiwa na viongozi wengine walifika hospitali hapo kuona huduma
zinavyoendelea.
Imeelzewa kuwa baada ya kuingia wodi ya wazazi walipokelewa na
kelele za wajawazito hao ambao walilalamikia kudorora kwa matibabu
kutokana na makali ya mgomo huo.
Akizungumza na MWANAFASIHI kwa sharti la kutotajwa jina lake, mmoja
wa wauguzi wa wodi hiyo alisema hali bado si nzuri na kwamba ni Dk.
Kamugisha pekee ndiye anayefanya kazi baada ya wengine kugoma.
"Dk. Kamugisha Mungu aendelee kumsaidia kwani ndiye pekee
anayefanya kazi akisaidiana na sisi wauguzi ambao tumeambiwa tutoe
huduma kwa wagonjwa waliopo wodini pasipo kuwapokea wa nje,'' alisema
muuguzi huyo.
Alisema hali inatisha kwenye wodi ya watoto njiti kwani ni kama
wametelekezwa bila msaada na si wauguzi wote wanaoweza kuwaangalia
kutokana na hali zao zilivyo.
Mjamzito, Rehema Ali mkazi wa Kiwalani, alisema jana alikuwa
afanyiwe upasuaji wa uzazi katika hospitali hiyo na daktari wake
aliyemtaja kwa jina la Kapona, lakini hakupokelewa kutokana na mgomo
unaoendelea.
"Dokta wangu Kapona aliniambia siwezi kufanyiwa upasuaji hivyo
aliniambia niende Hospitali ya Mwananyamala ambapo nitafanyiwa upasuaji
huo leo,'' alisema.
Katika hatua nyingine, Mwandishi Wetu aliyekuwepo eneo la mapokezi
katika wodi hiyo ya wazazi jana asubuhi alishuhudia mjamzito Ashura
Kazeba akikataliwa kupokelewa hospitalini hapo kwa madai kwamba hakuna
huduma.
Mjamzito huyo alinusuriwa na Dk. Kamugisha baada ya kuambiwa
alizuiliwa ambapo alifika mapokezi na kuanza kuwafokea wauguzi
waliokuwepo na kuamuru wampeleke wodini.
"Nani amemzuia mama huyu asipokelewe, mnamrudisha nyumbani kwa
agizo la nani? Mwandikisheni na kisha mpelekeni wodini tusiharibiane
kazi,'' alisema Dk. Kamgisha kwa kufoka.
Meneja Uhusiano wa hospitali hiyo, Aminiel Aligaesha akizungumza na
waandishi wa habari jana alikiri madaktari bingwa wa hospitali hiyo
kuazimia kusitisha huduma za matibabu mpaka hapo Serikali itakapotoa
tamko rasmi kuhusu muafaka wa suala hilo.
Alisema wagonjwa waliopo wodini wataendelea kuangaliwa na madaktari
wakuu wa idara na madaktari wachache waliojitolea na kuwa madaktari wa
Jeshi la Wananchi wa Tanzania wataendelea kuwaona wagonjwa kwa dharura.
Akifafanua juu ya kufukuzwa kwa wagonjwa, alisema kwamba hakuna
mgonjwa aliyefukuzwa kama ilivyodaiwa na vyombo vya habari kwani juzi
takwimu zinaonesha wagonjwa 811 walipokelewa hospitalini hapo.
Alisema huduma za uuguzi zinaendelea kama kawaida na wanatoa
shukurani kwa wauguzi wanaoendelea na kazi katika kipindi hiki cha
mgomo.
Katika muendelezo wa matukio ya mgomo huo wa madaktari imeelezwa
vifo katika Hospitali ya Temeke vimeongezea hasa kwa wagonjwa
waliowapeleka hospitali ya Taifa ya Muhimbili na kukataliwa.
"Tunasikitika kuona wagonjwa tunaowawapeleka Muhimbili kwa matibabu
wakikataliwa kupokelewa na badala yake tunarudishiwa na matokeo yake
karibu wote waliorudishwa wamepoteza maisha,'' alidai mmoja wa wauguzi
wa hospitali hiyo.
Kutokana na hali hiyo, kwa masaa kadhaa madaktari na wauguzi
walisimamisha kutoa huduma kwa muda ili kujua hatima ya suala hilo na
kufanya wagonjwa kurejea nyumbani.
Mwandishi wetu aliyefika hospitalini hapo alishuhudia madaktari na
wauguzi wa hospitali hiyo wakiwa kwenye mkutano wa dharura katika moja
ya chumba katika ofisi ya Mganga Mkuu.
Hata hivyo, baada ya kikao hicho walionekana kurudi katika maeneo
yao ya kazi na kuendelea kutoa huduma. Jitihada za kuonana na Mganga
Mkuu wa hospitali hiyo, Amani Malima ili kuzungumzia suala hilo
hazikuzaa matunda baada ya mwandishi wetu kumpigia simu na kujibiwa kuwa
aende ofisini na alipofika Katibu Muhtasi wake alisema yupo na wageni.
STORI NA PICHA KWA HISANI YA DOTTO MWAIBALE |
Post a Comment