WATALII DUNIANI KUSHUHUDIA KUPATWA KWA JUA SEPTEMBA MOSI MBEYA

Mkurugenzi Mtendaji wa kampuni ya Utalii ya UPL Gabriel Shawa akiwaonesha wanahabari mfumo wa mwendo wa jua utakaosababisha kupatwa kwa mwezi Septemba Mosi nchini Tanzania katika wilaya ya Mbarali mkoani Mbeya

 

NI tukio la kipekee ni tukio la kihistoria na ni tukio la kiutalii litakalokusanya maelfu ya watalii kote duniani kushuhudia kupatwa kwa jua katika wilaya ya Mbarali iliyopo mkoani Mbeya nchini Tanzania.

Itakuwa ni siku ya Alhamis majira kati ya saa 1:00 hadi saa 2:00 asubuhi Septemba Mosi mwaka huu mji wa Mbarali utashuhudia umati wa watalii kutoka kona zote za dunia ukishuhudia tukio hilo la kipekee la kupatwa kwa Jua.

Ni tukio nadra na la aina yake ambalo Chama Cha Waandishi wa Habari za Utalii na uwekezaji nchini (TAJATI) baada ya kufuatilia kwa kina mwenendo na mzunguko wa jua kupitia tovuti www.xjubier.free.eg  na kupitia mtandao wa http://eclipse.astronomie.info/sofi umeonesha kwamba tukio la kupatwa kwa jua mkoani Mbeya litaonekana majira ya saa moja na nusu asubuhi ya Septemba mosi, mwaka huu.

Tukio hilo la kipekee duniani, linatarajiwa kuvutia wataalamu wa masuala ya unajimu kutoka sehemu mbali mbali duniani na watalii wa ndani na nje ya nchi.

Baadhi ya makampuni ya utalii ya nje na ndani yameanza maandalizi kwa ajili ya tukio hilo la kipekee, ambapo mamia ya watalii wa ndani na nje wanatarajiwa kuwepo mkoani Mbeya kushuhudia tukio hilo ikiwa ni pamoja na kutembelea vivutio vingine vya utalii vilivyopo nchini.

Mkurugenzi Mtendaji wa Kampuni ya kusafirisha watalii ya UPL, Gabriel Shawa akichangia kwenye kikao cha Kamati ya Utalii Mkoa wa Mbeya, kilichokuwa na kazi ya kupitia mpango mkakati wa miaka mitano wa kamati hiyo aliwaeleza wanahabari wa chama cha Waandishi wa habari za Utalii na Uwekezaji Tanzania(TAJATI) kwamba wameanza kuyatambua maeneo ya vivutio kwa ajali ya ugeni huo mkubwa. 

Kulingana na maelezo ya kisayansi kuhusu tukio hilo, tukio hilo la kupatwa kwa jua hutokea kwa mwezi unapopita baina ya dunia na jua na kusababisha kuzuia mwanga wa jua kuufikia dunia au kufikia mwanga kwa kiwango hafifu.

Kampuni ya Bestway Safari ya nchini Canada imeandaa safari kwa ajili ya watalii wake kuja kushuhudia tukio hilo mkoani Mbeya ambapo pia watatembelea maeneo ya utalii ikiwemo Mbuga ya Serengeti, Ngorongoro, Tarangire na Ruaha.